სააქციო საზოგადოების სარეგისტრაციო მონაცემების კანონთან შესაბამისობაში მოყვანა

2025-02-13 ავტორი: ნინო ფირანაშვილი

„მეწარმეთა შესახებ“ საქართველოს კანონის თანახმად, 2022 წლის პირველ იანვრამდე რეგისტრირებულ საწარმოებს 2025 წლის 1 აპრილამდე აქვთ განსაზღვრული ვადა საზოგადოების სარეგისტრაციო მონაცემების კანონთან შესაბამისობაში მოსაყვანად.

სააქციო საზოგადოებისთვის მეწარმეთა შესახებ კანონის თანახმად, განსხვავებულად რეგულირდება კანონთან შესაბამისობაში მოყვანის პროცედურა.

სარეგისტრაციო მონაცემების განახლებისთვის საჭიროა:

აქციონერთა საერთო კრების მოწვევა მეწარმეთა შესახებ საქართველოს კანონის წესის დაცვით;
გადაწყვეტილების მიღება კანონით დადგენილი წესით;
ახალი სადამფუძნებლო დოკუმენტაციის მომზადება;
დოკუმენტაციის წარდგენა მარეგისტრირებელ ორგანოში;

როგორ ხდება აქციონერთა საერთო კრების მოწვევა მეწარმეთა შესახებ საქართველოს კანონის წესის დაცვით?

საერთო კრებას იწვევს სააქციო საზოგადოების ხელმძღვანელი ორგანო - დირექტორი. მოწვევის შესახებ გადაწყვეტილება უნდა გამოქვეყნდეს მარეგისტრირებელი ორგანოს ელექტრონულ პორტალზე საერთო კრების ჩატარების თარიღამდე, სულ მცირე 21 დღით ადრე. გამოქვეყნებისთვის საჭიროა რეესტრში სუბიექტის პირველადი რეგისტრაცია, სადაც ერთიან ელექტრონულ პორტალზე სააგენტო ქმნის სუბიექტის ავტორიზებული მომხმარებლის გვერდს − ელექტრონულ მისამართს.

სააქციო საზოგადოების საერთო კრების მოწვევის შესახებ გადაწყვეტილება ქვეყნდება აგრეთვე სააქციო საზოგადოების ვებგვერდზე (არსებობის შემთხვევაში).

რას უნდა შეიცავდეს საერთო კრების მოწვევის შესახებ გამოქვეყნებული ინფორმაცია?

სააქციო საზოგადოების საფირმო სახელწოდებასა და იურიდიულ მისამართს;
საერთო კრების ჩატარების ადგილს, თარიღსა და დროს;
აღნიშვნას, მორიგი საერთო კრება ტარდება თუ რიგგარეშე;
საერთო კრების სააღრიცხვო დღეს და მითითებას, რომ საერთო კრებაში მონაწილეობისა და ხმის მიცემის უფლება აქვთ მხოლოდ იმ პირებს, რომლებიც სააღრიცხვო დღეს აქციონერებად ირიცხებიან;
საერთო კრების დღის წესრიგს.

საერთო კრების მიერ გადაწყვეტილების მიღება კანონით დადგენილი წესით

,,მეწარმეთა შესახებ’’ საქართველოს კანონის თანახმად, აქციონერთა საერთო კრება გადაწყვეტილებას იღებს კენჭისყრაში მონაწილეთა ხმების უმრავლესობით, მაგრამ წესდებაში/სადამფუძნებლო შეთანხმებაში შესატანი ცვლილება უნდა მიიღონ კენჭისყრაში მონაწილეთა ხმების 3/4-ის უმრავლესობით, თუ წესდებით ხმათა უფრო დიდი რაოდენობა არ არის გათვალისწინებული.

ასევე უნდა გაითვალისწინოთ, რომ თუ საერთო კრების დღის წესრიგით გათვალისწინებულია წესდების შეცვლა ან მისი ახალი რედაქციის მიღება, ცვლილების ან ახალი რედაქციის ტექსტი უნდა გამოქვეყნდეს საერთო კრების მოწვევის შესახებ ინფორმაციასთან ერთად.

რაც შეეხება საერთო კრებაში მონაწილეობისა და ხმის მიცემის უფლებას, იგი აქვთ მხოლოდ იმ აქციონერებს, რომლებსაც საერთო კრების სააღრიცხვო დღისთვის აქციებზე საკუთრების უფლება ჰქონდათ, რაც უნდა დადასტურდეს აქციათა რეესტრის ჩანაწერით.

ახალი სადამფუძნებლო დოკუმენტაციის მომზადება

სადამფუძნებლო დოკუმენტაციის მომზადებისას, სააქციო საზოგადოებამ სარეგისტრაციო მონაცემებში სავალდებულოა, მიუთითოს სააქციო საზოგადოების რეგისტრაციის მომენტისთვის განთავსებული კაპიტალის ოდენობა. ასევე, სავალდებულოდ უნდა მიუთითოს განაღდებული კაპიტალის ოდენობა. ამასთან, არსებობის შემთხვევაში, შესაძლებელია ნებადართული კაპიტალის ოდენობის მითითება.

სააქციო საზოგადოების განთავსებული კაპიტალის მინიმალური ოდენობა სააქციო საზოგადოების რეგისტრაციის მომენტისთვის უნდა შეადგენდეს, სულ მცირე, 100 000 ლარს. განაღდებული კაპიტალი ფულადი სახით უნდა იყოს შევსებული და იგი უნდა შეადგენდეს განთავსებული კაპიტალის, სულ მცირე, 25%-ს.

სარეგისტრაციო მონაცემების ახალ კანონთან შესაბამისობისათვის აუცილებელია სუბიექტის პორტალზე რეგისტრაცია, კერძოდ, უნდა განისაზღვროს ავტორიზებული მომხმარებლის გვერდის (ელექტრონული მისამართის) მართვაზე პასუხისმგებელი ხელმძღვანელობასა და წარმომადგენლობაზე უფლებამოსილების მქონე პირის მონაცემები და მის მფლობელობაში/სარგებლობაში არსებულ საქართველოში მოქმედი მობილური ოპერატორის მობილური ტელეფონის ნომერი და ელექტრონული ფოსტის მისამართი.

ვინაიდან ახალი კანონით დადგინდა, რომ მეწარმის იურიდიული მისამართი მისი ფიზიკური მისამართია საქართველოს ტერიტორიაზე, სუბიექტის იურიდიული მისამართი უნდა განისაზღვროს აღნიშნული მოთხოვნის შესაბამისად, ან უფლებამოსილი პირის მიერ დადასტურდეს, რომ მეწარმის უკვე რეგისტრირებული იურიდიული მისამართი მისი ფიზიკური მისამართია.

იურიდიული მისამართის შეცვლის შემთხვევაში, დაინტერესებულმა პირმა უნდა წარმოადგინოს უძრავი ნივთის მესაკუთრის სათანადო ფორმით შედგენილი და დამოწმებული თანხმობა ან უძრავ ნივთზე დაინტერესებული პირის სარგებლობის უფლების დამადასტურებელი კანონმდებლობით დადგენილი წესით შედგენილი დოკუმენტი.

დოკუმენტაციის წარდგენა მარეგისტრირებელ ორგანოში

ბოლო ეტაპს წარმოადგენს მარეგისტრირებელ ორგანოში განცხადების წარდგენა, რომელსაც უნდა ერთოდეს წესდებით განსაზღვრული უფლებამოსილი ორგანოს - საერთო კრების გადაწყვეტილება, ამონაწერი აქციათა რეესტრიდან და სათანადო წესით დამოწმებული სადამფუძნებლო შეთანხმება, რომლის შემადგენელი ნაწილიც არის სუბიექტის წესდება.