რატომ უნდა ჰყავდეს სამშენებლო კომპანიას იურისტი

2025-03-29 ავტორი: ნინო ფირანაშვილი

სამშენებლო ბიზნესი რთული და მრავალფეროვანი სფეროა, რომელიც დაკავშირებულია სამართლებრივ რეგულაციებთან, სხვადასხვა ტიპის ხელშეკრულებებთან, ნებართვებთან და სხვა იურიდიულ საკითხებთან. ამ პროცესებში მცირე შეცდომამაც კი შეიძლება კომპანიას სერიოზული ფინანსური და რეპუტაციული ზიანი მიაყენოს. სწორედ ამიტომ, სამშენებლო კომპანიებისთვის მნიშვნელოვანია, რომ ჰყავდეთ კვალიფიციური იურისტი, რომელიც სამართლებრივ რისკებს მართავს და კომპანიის ინტერესებს დაიცავს.

განვიხილოთ სამართლებრივად რა ეტაპების გავლა უწევს სამშენებლო კომპანიას საქმიანობის განხორციელების პროცესში.

1. იურიდიული დოკუმენტების შემუშავება და კონტროლი.

სამშენებლო კომპანიებს უწევთ სხვადასხვა ტიპის ხელშეკრულებების გაფორმება როგორც დამკვეთებთან, ისე კონტრაქტორებთან, მიწის მესაკუთრეებთან, სახელმწიფო დაწესებულებებთან და სხვა დაინტერესებულ მხარეებთან.  

აღნიშნულ შემთხვევაში იურისტი უზრუნველყოფს:

• შესაბამისი ხელშეკრულებების მომზადებას და რევიზიას, რათა ისინი კომპანიის ინტერესებს შეესაბამებოდეს.
• დოკუმენტაციის შესაბამისობას საქართველოს კანონმდებლობასთან.
• პოტენციური სამართლებრივი რისკების თავიდან არიდებას.

2. სამშენებლო ნებართვები და რეგულაციები

სამშენებლო პროცესისთვის აუცილებელია სხვადასხვა ნებართვის მოპოვება, რაც კონკრეტული სამართლებრივი მოთხოვნების დაცვას მოითხოვს.

აღნიშნულ შემთხვევაში იურისტი უზრუნველყოფს:

• საჭირო ნებართვებისა და ლიცენზიების დროულად მიღებაში მონაწილეობას;
• სახელმწიფო უწყებებთან ურთიერთობასა და დოკუმენტაციის წესრიგში მოყვანას;

3. დავების მართვა

სამშენებლო სექტორში ხშირია დავები მიწის მესაკუთრეებთან, პარტნიორებთან, კონტრაქტორებთან თუ დასაქმებულებთან.

იურისტი კომპანიისთვის ხელსაყრელი გამოსავლის პოვნაში ეხმარება, კერძოდ უზრუნველყოფს:

• დავის პრევენციას ხელშეკრულებების სწორად შედგენით;
• მოლაპარაკებების წარმოებასა და შუამავლობით საკითხების მოგვარებას;
• სასამართლო პროცესების მართვასა და კომპანიის ინტერესების დაცვას.

4. შრომითი ურთიერთობები და უსაფრთხოების ნორმები

სამშენებლო კომპანიაში დასაქმებულთა უსაფრთხოება ერთ-ერთი მთავარი პრიორიტეტია.

აღნიშნულ შემთხვევაში იურისტი უზრუნველყოფს:

• შრომითი ხელშეკრულებების სწორად შედგენას;
• შრომისა და უსაფრთხოების ნორმების დაცვას;
• შესაძლო შრომით დავებთან დაკავშირებულ საკითხების მოგვარებას;

5. საგადასახადო და ფინანსური სამართალი

სამშენებლო კომპანიებს ხშირად უწევთ დიდი ბიუჯეტით ოპერირება, რაც ფინანსურ და საგადასახადო რისკებს მოიცავს.

აღნიშნულ შემთხვევაში იურისტი უზრუნველყოფს:

• ფინანსურ მენეჯერთან ერთად საგადასახადო კანონმდებლობის დაცვას;
• საბანკო და საკრედიტო შეთანხმებების იურიდიულად გამართულობას და პროცესში ჩართულობას;
• ინვესტორებთან და პარტნიორებთან სამართლებრივი გარიგებების სანდოობას.

დასკვნის სახით შეგვიძლია ვთქვათ, რომ:

სამშენებლო ბიზნესში ნებისმიერი სამართლებრივი საკითხის უგულებელყოფამ შეიძლება კომპანიას სერიოზული ფინანსური და რეპუტაციული ზიანი მიაყენოს. კვალიფიციური იურისტის დახმარებით კი კომპანია თავიდან აირიდებს სამართლებრივ შეცდომებს, დაიცავს საკუთარ ინტერესებს და მშვიდ გარემოში განახორციელებს პროექტებს.

ამიტომ, სამშენებლო კომპანიისთვის იურისტის ყოლა არა მხოლოდ რეკომენდირებულია, არამედ აუცილებელიცაა.

დაუკავშირდით სტატიის ავტორს