მნიშვნელოვანი ინფორმაცია საწარმოთა ხელახალი სავალდებულო რეგისტრაციის შესახებ
„მეწარმეთა შესახებ" საქართველოს კანონში შეტანილი ცვლილებების საფუძველზე, ყველა მოქმედ საწარმოს (გარდა ინდივიდუალური მეწარმისა) ეკისრება ვალდებულება განაახლოს სარეგისტრაციო მონაცემები. გთავაზობთ დეტალურ ინფორმაციას მნიშვნელოვანი საკანონმდებლო ცვლილების შესახებ. რეგისტრაციის განახლების ვალდებულება კანონის თანახმად, საწარმოებმა 2025 წლის 1 აპრილამდე უნდა უზრუნველყონ სარეგისტრაციო მონაცემების შესაბამისობა ახალი კანონის მოთხოვნებთან. ეს მოთხოვნა ვრცელდება როგორც საწარმოზე, ისე მის ფილიალებზე. ვალდებულება ეხება საწარმოს, რომელიც სამეწარმეო რეესტრში რეგისტრირებულია 2022 წლის პირველ იანვრამდე. სამართლებრივი შედეგები ვალდებულების შეუსრულებლობის შემთხვევაში დადგება შემდეგი სამართლებრივი შედეგები: საწარმოს რეგისტრაციის შეჩერება წარმომადგენლობითი უფლებამოსილების შეზღუდვა საწარმოს ქონების განკარგვის უფლების შეზღუდვა საგადასახადო ოპერაციებში მონაწილეობის შეზღუდვა საბანკო ანგარიშების მართვისა და ახალი ანგარიშების გახსნის შეზღუდვა საბანკო ანგარიშზე არსებული თანხის განკარგვის შეზღუდვა კრედიტის აღების შესაძლებლობის შეზღუდვა მნიშვნელოვანი ვადები 2025 წლის 1 აპრილი - რეგისტრაციის განახლების საბოლოო ვადა 2026 წლის 1 იანვარი - მარეგისტრირებელი ორგანოს მიერ ხარვეზიანი რეგისტრაციების გამოვლენის დაწყება ხარვეზის დადგენის შემდგომ - 3 თვიანი ვადა მის გამოსასწორებლად 3 თვიანი ვადის გასვლის შემდეგ - რეგისტრაციის გაუქმების შესაძლებლობა რეგისტრაციის განახლების პროცედურა სარეგისტრაციო მონაცემების განახლებისთვის საჭიროა: დამფუძნებელთა გადაწყვეტილების მიღება კანონით დადგენილი წესით გადაწყვეტილების მიღება 2022 წლის 1 იანვრამდე რეგისტრირებული წესდებით დადგენილი ხმათა რაოდენობით ახალი სადამფუძნებლო შეთანხმების შესაბამისობა კანონთან დოკუმენტაციის წარდგენა მარეგისტრირებელ ორგანოში ჩვენი იურიდიული მომსახურება ჩვენი საადვოკატო ბიურო გთავაზობთ კვალიფიციურ დახმარებას: სარეგისტრაციო დოკუმენტაციის მომზადება დამფუძნებელთა კრების ორგანიზება და დოკუმენტაციის შედგენა ახალი სადამფუძნებლო შეთანხმების მომზადება მარეგისტრირებელ ორგანოსთან ურთიერთობის წარმართვა განსაკუთრებული შემთხვევები ინდივიდუალურ მეწარმეებზე არ ვრცელდება რეგისტრაციის განახლების ვალდებულება არასამეწარმეო (არაკომერციული) იურიდიული პირები უფლებამოსილნი არიან ნებაყოფლობით განაახლონ რეგისტრაცია რეგისტრაციის გაუქმების შემდეგ, ქონების აღმოჩენის შემთხვევაში, შესაძლებელია სასამართლოს მიერ ლიკვიდატორის დანიშვნა დამატებითი კონსულტაციისთვის დაგვიკავშირდით 591811588.
რა უნდა ვიცოდეთ საპროცესო შეთანხმების შესახებ
საპროცესო შეთანხმება არის ბრალდებულსა და პროკურორს შორის დადებული შეთანხმება, რომლითაც ბრალდებული აღიარებს დანაშაულს და უთანხმდება პროკურორს სასჯელზე, ბრალდების შემსუბუქებაზე ან ნაწილობრივ მოხსნაზე. როგორც წესი, შეთანხმება ითვალისწინებს თანამშრომლობას ან/და ზიანის ანაზღაურებას. საპროცესო შეთანხმების დადებისას, შესაძლებელია კანონით გათვალისწინებულ მინიმალურ სასჯელზე მსუბუქ სასჯელზე შეთანხმებაც, ბრალდების შემსუბუქება ან ნაწილობრივ მოხსნა. საპროცესო შეთანხმება ფორმდება წერილობით და მტკიცდება სასამართლოს მიერ გამოტანილი განაჩენით. საპროცესო შეთანხმების დადების შეთავაზება შეუძლია როგორც ბრალდებულს/მსჯავრდებულს, ისე პროკურორს. მისი დადება შესაძლებელია, როგორც სასამართლოს პირველ ინსტანციაში, ასევე განაჩენის გამოტანის შემდეგ. თუმცა, როგორც წესი, ყველაზე ხშირად საპროცესო შეთანხმება ბრალდებულის სასამართლოში პირველი წარდგენის სხდომაზე მტკიცდება. საპროცესო შეთანხმების შესახებ დგება ოქმი, რომელშიც ასახულია ბრალდებულსა და პროკურორს შორის მოლაპარაკების პროცესი. საპროცესო შეთანხმების ოქმის ასლი ბრალდებულსა და მის ადვოკატს გადაეცემა. ბრალდებულსა და მის ადვოკატს უფლება აქვთ, საპროცესო შეთანხმების ოქმზე გამოთქვან შენიშვნები, რომელიც თან ერთვის ამ ოქმს. საპროცესო შეთანხმების ოქმს ხელს აწერენ პროკურორი, ბრალდებული და მისი ადვოკატი, ასევე ბრალდებულის კანონიერი წარმომადგენელი, ასეთის არსებობის შემთხვევაში. საყურადღებოა, რომ საპროცესო შეთანხმების დადების შემთხვევაში, სასამართლოს გამამტყუნებელი განაჩენი მტკიცებულებების უშუალოდ და ზეპირად გამოკვლევის გარეშე გამოაქვს. საპროცესო შეთანხმების დადება არ ათავისუფლებს ბრალდებულს სამოქალაქო და სხვა სახის პასუხისმგებლობისაგან. ბრალდებულს უფლება აქვს, სასამართლოს მიერ საქმის არსებითი განხილვის გარეშე განაჩენის გამოტანამდე, ნებისმიერ დროს თქვას უარი საპროცესო შეთანხმებაზე. განაჩენის გამოტანის შემდეგ საპროცესო შეთანხმებაზე უარის თქმა დაუშვებელია. სასამართლოს განაჩენი კანონიერ ძალაში შედის გამოცხადებისთანავე და საჩივრდება მხოლოდ იმ შემთხვევაში თუ: საპროცესო შეთანხმება იძულებით, მუქარით, ძალადობით, დაშინებით, ან მოტყუებით დაიდო; თუ ბრალდებულს შეეზღუდა დაცვის უფლება; თუ საპროცესო შეთანხმება ისე დაიდო, რომ ბრალდებულის მიერ ბრალის აღიარების გათვალისწინებითაც კი, საქმეში არ არის საკმარისი მტკიცებულებები, რომელიც ობიექტურ პირს დაარწმუნებდა, რომ დანაშაული ბრალდებულმა ჩაიდინა. აღსანიშნავია, რომ თუ ბრალდებულთან მიმდინარეობს მოლაპარაკება საპროცესო შეთანხმების დადების თაობაზე, სავალდებულოა, ბრალდებულს ჰყავდეს ადვოკატი. თუ გსურთ საპროცესო შეთანხმების დადება და გჭირდებათ ადვოკატის დახმარება, შეგიძლიათ, დაგვიკავშირდეთ ნომერზე: 591811588.
კომპანიის სარეგისტრაციო მონაცემების მეწარმეთა შესახებ ახალ კანონთან შესაბამისობაში მოყვანა
სტატია განახლდა, ახალი სტატია: მნიშვნელოვანი ინფორმაცია საწარმოთა ხელახალი სავალდებულო რეგისტრაციის შესახებ თუ თქვენი კომპანია (შპს, სპს, სს, კს, კოოპერატივი, უცხო ქვეყნის საწარმოს ფილიალი, ასევე ინდივიდუალური მეწარმე და არასამეწარმეო არაკომერციული იურიდიული პირი) სამეწარმეო რეესტრში რეგისტრირებულია 2022 წლის პირველ იანვრამდე, თქვენ ვალდებული ხართ, 2023 წლის ბოლომდე, "მეწარმეთა შესახებ" ახალი კანონის მოთხოვნებთან შესაბამისობაში მოიყვანოთ კომპანიის სარეგისტრაციო მონაცემები. ვალდებულების შეუსრულებლობის შემთხვევაში, "სამეწარმეო რეესტრი" განგისაზღვრავთ დამატებით 3 თვიან ვადას. დამატებით ვადაში ვალდებულების შეუსრულებლობის შემთხვევაში, თქვენი კომპანიის რეგისტრაცია გაუქმდება. კომპანიის სარეგისტრაციო მონაცემების "მეწარმეთა შესახებ" ახალი კანონის მოთხოვნებთან შესაბამისობაში მოსაყვანად საჭიროა: "მეწარმეთა შესახებ" ახალი კანონის მოთხოვნებთან შესაბამისობაში მოყვანის შესახებ კომპანიის გადაწყვეტილების (პარტნიორთა საერთო კრების ოქმი, გამგეობის ოქმი და სხვა) წარდგენა; სადამფუძნებლო შეთანხმების წარდგენა; ახალ კანონთან შესაბამისობაში მოყვანილი წესდების წარდგენა ან იუსტიციის მინისტრის მიერ დამტკიცებული სტანდარტული წესდების გამოყენება; საჯარო რეესტრის ეროვნული სააგენტოს მომსახურების საფასური (1 სამუშაო დღეში 200 ლარი; განცხადების შეტანის დღეს - 400 ლარი; ხელმოწერის დადასტურების საფასური: ერთ ხელმოწერაზე 7 ლარი); ელექტრონულ პორტალზე რეგისტრაცია. iuristi.ge, "მეწარმეთა შესახებ" ახალი კანონის ამოქმედებიდან, მომსახურებას უწევს კომპანიებს მათი სარეგისტრაციო მონაცემების კანონთან შესაბამისობაში მოყვანაში. კონსულტაციისათვის დაგვიკავშირდით: 591811588.
შრომითი ბინადრობის ნებართვის მიღება
საქართველოს კანონმდებლობით გათვალისწინებული ბინადრობის ნებართვის ერთ-ერთი სახეა შრომითი ბინადრობის ნებართვა. შრომითი ბინადრობის ნებართვა გაიცემა უცხოელზე საქართველოში სამეწარმეო ან შრომითი საქმიანობის განსახორციელებლად. შრომით საქმიანობად ითვლება ნებისმიერი საქმიანობა რომლიდანაც პირი იღებს ანაზღაურებას. ბინადრობის ნებართვის გაცემის საკითხებს არეგულირებს საქართველოს კანონი "უცხოელთა და მოქალაქეობის არმქონე პირთა სამართლებრივი მდგომარეობის შესახებ" და საქართველოს მთავრობის 2014 წლის 1 სექტემბრის N520-ე დადგენილება "საქართველოში ბინადრობის ნებართვის გაცემის საკითხის განხილვისა და გადაწყვეტის წესის დამტკიცების შესახებ". შრომითი ბინადრობის ნებართვის მიღების მიზნით, უცხოელმა განცხადებით უნდა მიმართოს საქართველოს იუსტიციის სამინისტროს მმართველობის სფეროში მოქმედ საჯარო სამართლის იურიდიული პირს – სახელმწიფო სერვისების განვითარების სააგენტოს (იუსტიციის სახლი). შრომითი ბინადრობის ნებართვის მოსაპოვებლად უცხოელმა სააგენტოში უნდა წარადგინოს: 1. დადგენილი ფორმის განცხადება - აღნიშნული სააპლიკაციო ფორმის მიღება შესაძლებელია იუსტიციის სახლებში. 2. ფოტოსურათი, ზომით 3/4. 3. უცხოელის სამგზავრო დოკუმენტის ასლი - უცხოელის პასპორტი სააგენტოს შეიძლება წარედგინოს ქართულენოვანი თარგმანის გარეშე, თუ იგი შეიცავს უცხოელის პერსონალურ მონაცემებს ლათინური ტრანსლიტერაციით. 4. საქართველოში კანონიერად ყოფნის დამადასტურებელი დოკუმენტის ასლი - საქართველოს ვიზა ან სხვა დოკუმენტი, რომლითაც დასტურდება, რომ საქართველოში კანონიერად იმყოფებით. 5. საქართველოში სამეწარმეო ან შრომითი საქმიანობის განხორციელების დამადასტურებელ დოკუმენტი - შრომითი ხელშეკრულება ან სამუშაოზე მიღების დამადასტურებელი სხვა დოკუმენტი. თუ აღნიშნული დოკუმენტებით ვერ დასტურდება უცხოელის ლეგალური შემოსავალი, შემოსავლად ასევე შეიძლება, ჩაითვალოს უცხოელის პირად საბანკო ანგარიშზე რიცხული თანხა (მათ შორის, ბანკის მიერ გაცემული ცნობა), რომლის ოდენობაც, შრომითი ბინადრობის ნებართვის ხანგრძლივობის გათვალისწინებით, ყოველთვიურად არ უნდა იყოს საქართველოში განსაზღვრული საშუალო მომხმარებლის საარსებო მინიმუმის ხუთმაგ ოდენობაზე ნაკლები. 6. ცნობა, რომლითაც დასტურდება, რომ მის მიერ საქართველოში სამეწარმეო ან შრომითი საქმიანობიდან მიღებული ყოველთვიური შემოსავალი/შრომის ანაზღაურება არ არის საქართველოში განსაზღვრული საშუალო მომხმარებლის საარსებო მინიმუმის ხუთმაგ ოდენობაზე ნაკლები. 7. სსიპ − შემოსავლების სამსახურის მიერ გაცემული დოკუმენტი, რომლითაც დასტურდება, რომ განმცხადებელი უცხოელის დამსაქმებელი საწარმოს ან მის მიერ დაფუძნებული საწარმოს წლიური ბრუნვა შრომითი ბინადრობის ნებართვის მსურველ თითოეულ უცხოელზე 50 000 ლარზე ნაკლები არ არის, თუ უცხოელის დამსაქმებელი ან მის მიერ დაფუძნებული საწარმო საგანმანათლებლო ან სამედიცინო დაწესებულებაა, წლიური ბრუნვა არის არანაკლებ 35 000 ლარისა შრომითი ბინადრობის ნებართვის მსურველ თითოეულ უცხოელზე. 8. მომსახურების საფასურის გადახდის დამადასტურებელი ქვითარი. სახელმწიფო სერვისების განვითარების სააგენტო შრომითი ბინადრობის ნებართვის გაცემასთან დაკავშირებით გადაწყვეტილებას იღებს 30 დღეში, მომსახურების საფასური 210 ლარია. შესაძლებელია დაჩქარებული მომსახურების მიღებაც - 20 დღეში გადაწყვეტილების მიღების მოთხოვნის შემთხვევაში მომსახურების საფასური 330 ლარია, ხოლო 10 დღეში გადაწყვეტილების მიღების მოთხოვნის შემთხვევაში - 410 ლარი. შრომითი ბინადრობის ნებართვა გაიცემა არაუმეტეს 6 წლის ვადით. ჩვენი კომპანიის იურისტები დაგეხმარებიან შრომითი ბინადრობის ნებართვის მისაღებად სახელმწიფო სერვისების განვითარების სააგენტოში წარსადგენი დოკუმენტების მოპოვებაში, ასევე გაგიწევენ წარმომადგენლობას იუსტიციის სახლებში.
ბავშვის საზღვარგარეთ გაყვანა
როგორც წესი, განქორწინების შემდეგ, არასრულწლოვანი შვილები ერთ-ერთ მშობელთან ცხოვრობენ. მშობელი ზრუნავს შვილის განვითარებაზე, ცდილობს მაქსიმალურად კარგი განათლება მისცეს შვილს და უზრუნველყოს სხვა საჭიროებებით. ხშირად, მშობელს სურს შვილი გაიყვანოს საზღვარგარეთ სამკურნალოდ, განათლების მისაღებად ან სხვა ობიექტური მიზეზით. საქართველოს კანონმდებლობით 16 წლამდე არასრულწლოვნის პასპორტის გასაცემად, გამონაკლისი შემთხვევების გარდა, აუცილებელია ორივე მშობლის თანხმობა. შესაძლოა მეორე მშობელი არ ასრულებდეს მის მოვალეობებს, არ ზრუნავდეს საკუთარ შვილზე, მაგრამ მისი თანხმობის გარეშე ბავშვს არ აქვს საშუალება დატოვოს საქართველოს საზღვრები. სამწუხაროდ, ხშირად, მშობელი სიჯიუტის ან სხვა მიზეზის გამო უარს ამბობს პასპორტის გაცემის ნებართვაზე მაშინაც, როდესაც ბავშვის საზღვარგარეთ არ გაყვანამ შეიძლება მისი ინტერესები დააზიანოს. ზოგჯერ, მშობლები უბრალოდ ვერ თანხმდებიან რა არის უკეთესი მათი შვილისათვის. ორივე შემთხვევაში, მხოლოდ სასამართლოა უფლებამოსილი შეუზღუდოს მშობელს უფლება და მიიღოს გადაწყვეტილება ბავშვის საზღვარგარეთ გაყვანის თაობაზე. სასამართლოს მიერ გადაწყვეტილების მიღების შემთხვევაში, ერთ-ერთ მშობელს საშუალება ექნება გაიყვანოს მისი შვილი საზღვარგარეთ. ჩვენი კომპანიის საოჯახო სამართალში სპეციალიზებული ადვოკატები დაგეხმარებიან დაიცვათ თქვენი და თქვენი არასრულწლოვნი შვილის ინტერესები სასამართლოში. ჩვენ დაგეხმარებით მოთხოვნის სწორად ჩამოყალიბებაში, სასამართლო დოკუმენტების მომზადებასა და სასამართლო სხდომებზე თქვენი ინტერესების დაცვაში. სასამართლო დავისათვის აუცილებელი დოკუმენტებისა და დამატებითი ინფორმაციის გასაგებად შეგიძლიათ მობრძანდეთ ჩვენს ოფისში.